މި ނިޒާމު އެކުލެވިގެންވަނީ މައިގަނޑު ތިން ތަނބެއްގެ މައްޗަށެވެ. މިއިން ކޮންމެ ތަނބަކީ ވެސް ވަކި މަގުސަދެއް ހާސިލްކުރުމަށް މިނިޒާމުގެ ފަރުމާގައި ހިމެނިފައިވާ ތަނބެކެވެ. އެގޮތުން ފުރަތަމަ ތަނބުގެ މަގުސަދަކީ އިސްރަށްވެހިންނަށް މާލީ އެހީތެރިކަން ފޯރުކޮށްދީ އިސްރަށްވެހިންގެ މެދުގައި ފަޤީރުކަން ނައްތާލުމަށް މަސައްކަތްކުރުމެވެ. ދެވަނަ ތަނބުގެ ދައުރަކީ މަސައްކަތްތެރިންނަށް ރިޓަޔަރކުރުމުގެ ކުރިން ލިބެމުން ދިޔަ މުސާރައިގެ ކަނޑައެޅޭ މިންވަރެއް ރިޓަޔަރމަންޓަށް ފަހު ޕެންޝަނުގެ ގޮތުގައި ލިބޭނޭ މިންވަރަށް ދުރާލައި ފައިސާ ރައްކާ ކުރެވޭނެ މަގު ފަހިކުރުމެވެ. ތިންވަނަ ތަނބުގެ ބޭނުމަކީ ކަނޑައެޅޭ ރިޓަޔަރމަންޓް އާމްދަނީއެއް ހޯދުމަށް މަގުފަހިކޮށްދިނުމެވެ.

މިނިޒާމުގައި ހިމެނޭ މޯލްޑިވްސް ރިޓަޔަރމަންޓް ޕެންޝަން ސްކީމްގެ މެންބަރުންނަށް ސްކީމު މެދުވެރިކޮށް ރައްކާކުރެވޭ ފައިސާއިން ޕެންޝަން ފޯރުކޮށް ދިނުމާއެކުއެކީ، ސްކީމު މެދުވެރިކޮށް ޕެންޝަނަށް ފައިސާ ރައްކާ ކުރުމުގެ ފުރުސަތު ނުލިބޭ މީހުންނާއި، ރައްކާކުރެވޭ ފައިސާއިން އެކަށޭނަ ޕެންޝަނެއް ނުލިބޭ މީހުންނަށް ޕެންޝަން ލިބޭ އުމުރު ހަމަވުމުން އަސާސީ ޕެންޝަން ފޯރުކޮށްދެއެވެ.

ދިވެހިރާއްޖޭގެ ޕެންޝަން ނިޒާމު ހިންގުމުގެ ޒިންމާ އަދާކުރަނީ ޕެންޝަނާ ބެހޭ ގާނޫނުގެ ދަށުން މިނިވަން މުވައްސަސާއެއްގެ ގޮތުގައި އުފެދިފައިވާ މޯލްޑިވްސް ޕެންޝަން އެޑްމިނިސްޓްރޭޝަން އޮފީސް (ޕެންޝަން އޮފީސް) އިންނެވެ. ޕެންޝަން އޮފީހުގެ މަސައްކަތްތަކަކީ ގަވާއިދުން މޮނިޓަރކޮށް ނަތީޖާ ވަޒަންކުރެވޭ ނިޒާމެއްގެ ތެރެއިން ހިންގޭ މަސައްކަތްތަކަކަށްވުމުން މިނިޒާމު ހަރުދަނާ އަދި ދެމެހެއްޓެނިވި ގޮތުގައި ހިންގުމަށް އެހީތެރިވެދެއެވެ.